TAFAKARI JUU YA KUTUBU NA KUIAMINI INJILI

Karibuni tutafakari pamoja kipindi cha kwaresma ni mwafaka kwa tafakari kama hii. Yesu anapotuambia tubuni na kuiamini injili (rej. Mk 1:15) anasisitiza kutubu dhambi siyo “kubuni dhambi.” Tunatambua wazi kuwa kuna watu kati yetu wanaobuni dhambi daima iwe kipindi cha kwaresma au la. Kuna watu wanabuni namna ya kubomoa nyumba za watu au mabenki (majambazi). Kuna watu wanabuni mbinu mpya za kikahaba (makahaba). Kuna watu wanabuni mbinu za rushwa (mafisadi). Watu wengine wanabuni namna ya kuwaudhi wenzao ili wao wafurahi (sophists). Wengine wanabuni bomu la kulipua ubalozi (magaidi) na mambo mengine mengi. Tuombeane sote hasa kipindi hiki cha kwaresma.

Kusema kweli haya ndiyo baadhi mambo ambayo Yesu anatufundisha kuyaacha. Hii ndiyo kazi yake kubwa na ya kwanza. Tukitafakari masomo ya jumapili kama tatu hivi kabla ya jumapili ya kwanza ya kwaresma tutaelewa vizuri sana. Tunaona kuwa Mama Kanisa anatuanda vizuri kuupokea ujumbe wa kutubu na kuiamini injili. Yesu anatenda miujiza mingi ilimradi tu watu watubu na kuiamini injili. Kimsingi miujiza ilikuwa ni namna ya kuelezea lengo lake (by the way). “ ‘Watu wote wanakutafuta’ akawaambia ‘twendeni mahali pengine katika vijjiji vya jirani nipate kuhubiri huko pia.’ Hiyo ndiyo nia ua kuja kwagu.” (Mk 1:38). Mtume Paulo naye anasisitiza “ole wangu nisipoihubiri injili”(1Kor 9:16). Kuiamini na kuiishi injili ndiyo njia pekee ya kutuepusha kuwa wabunifu katika dhambi, kuondolewa pepo na kupewa mikate haitoshi.

Kipindi hiki cha kwaresma tusibuni dhambi badala yake tuwe “wabunifu katika kuungama dhambi” yaani; kumwomba Roho Mtakatifu, kutafuta dhambi moyoni, kujuta dhambi, kukusudia kuacha dhambi, kuungama dhambi, kupokea maondoleo ya dhambi na kutimiza malipizi. Habari ya mwana mpotevu inatutafakarisha hatua hizi za wongofu (metanoia  - Rej. Lk 15:11-32). Tuwe wabunifu ndani ya nafsi zetu wenyewe tukijiuliza mbona nikiudhiwa kidogo tu napata hasira kali sana, moyo unajaa gesi inayoweza kuua? Tukumbuke kuwa kuna mahusiano kati ya dhambi na maisha ya udhalimu. Kadiri mtu anavyokuwa mbunifu katika dhambi ndivo anavyokuwa mtumwa wa mambo mengi mabaya yanayomuasili yeye na jamii (Rej Dan 9:3-20; Ezr 9:6-15; Mt 3:7-9; Rum 6:23). Maana ya kukusudia kuacha dhambi ni kuazimia kuacha dhambi na kuepa nafasi zake (Rej Mt 5:29-30).

Tumwombe Mungu mwenye huruma ili kwaresma hii tuitikie vyema mwaliko wa Papa Leo Mkuu katika mahubiri yake kipindi cha Krismasi akisisitiza; “Ewe mkristu, tambua cheo chako umeshirikishwa hali yake Mungu mwenyewe kwa hiyo usianguke tena katika fedheha na ubovu wa maisha yako ya kale…” (Sala ya Kanisa uk.94)

Tumsifu Yesu Kristu!

Asante kwa kutafakari & kwaresma njema!

Na. Frt Hillary Faraja - Theology III - (Geita Diocese)